ကိုရိုနာဗိုင်းရပ်စ် ( COVID-19 ) သံသယလူနာအဖြစ် သတ်မှတ်ခံရနိုင်တဲ့ အခြေအနေများ

ကိုရိုနာရောဂါ ကူးစက်ပြန့်ပွားမှုကို ကာကွယ်နိုင်ရန်အတွက် ကျန်းမာရေးနှင့် အားကစားဝန်ကြီးဌာနမှ Covid-19 ၏ အဓိကလက္ခဏာများ၊ ရောဂါကူးစက်ပုံနှင့် ရောဂါကာကွယ်နိုင်မည့် နည်းလမ်းများကို ထုတ်ပြန် ကြေညာထားပါသည်။

အထူးသဖြင့်…

• တရုတ်နိုင်ငံ၊ ဝူဟန်မြို့သို့ လွန်ခဲ့သည့် (၁၄) ရက်အတွင်း ခရီးသွားခဲ့ခြင်း

• လွန်ခဲ့သည့် (၁၄) ရက်အတွင်း Covid-19 ဖြစ်ပွားသည်ဟု သံသယရှိသူ သို့ အတည်ပြုခြင်းခံရသူနှင့် အတူနေထိုင်ခဲ့ခြင်း၊ 

• ဖျားခြင်း ( အပူချိန် ၃၈°C နှင့် အထက်ရှိခြင်း )

• ချောင်းဆိုးခြင်း၊ 

• အသက်ရှူရ ခက်ခဲခြင်း၊ 

• အားအင်ကုန်ခမ်းခြင်း စသည့် လက္ခဏာများ ပေါ်ပေါက်လာပါက Covid-19 သံသယလူနာဟု သတ်မှတ်နိုင်မည် ဖြစ်သည်။

အဆိုပါရောဂါ ကူးစက်ပုံအား အတိအကျ အတည်ပြုနိုင်ခြင်း မရှိသေးသော်လည်း ယခင်အလားတူ ကိုရိုနာဗိုင်းရပ်စ် ရောဂါပိုးများ၏ ကူးစက်ပုံများအရ...

• ချောင်းဆိုးခြင်း၊ နှာချေခြင်းမှတစ်ဆင့် တုပ်ကွေးရောဂါဗိုင်းရပ်စ်ပိုး (Influenza Virus) များ အပါအဝင် အခြားရောဂါပိုးများ လေထဲသို့ ရောက်ရှိပြီး အသက်ရှူလမ်းကြောင်းမှတစ်ဆင့် တိုက်ရိုက် ကူးစက်ပျံ့နှံ့စေခြင်း

• အရာဝတ္ထုများ၌ ထိကပ်နေသော ရောဂါပိုးများအား လက်နှင့် ကိုင်တွယ် ထိတွေ့ရာမှတစ်ဆင့် ကူးစက်ပျံ့နှံ့စေခြင်းများ ဖြစ်နိုင်ကြောင်း သိရသည်။

ထို့ကြောင့် ကိုရိုနာရောဂါ ကူးစက် ဖြစ်ပွားခြင်းမှ ကာကွယ်နိုင်ရန်အတွက်…

• ဖျားနာခြင်း၊ ချောင်းဆိုးခြင်း၊ နှာချေခြင်းစသည့် အသက်ရှူလမ်းကြောင်းဆိုင်ရာ ရောဂါလက္ခဏာများ ခံစားနေရသောသူများနှင့် အနီးကပ်နေထိုင်ခြင်းမှ ရှောင်ကြဉ်ပါ။

• လူထူထပ်သောနေရာများကို သွားလာခြင်းမှ ရှောင်ကြဉ်ပါ။ 

• လက်ကို စင်ကြယ်အောင် ဆပ်ပြာနှင့် ရေတို့ကို အသုံးပြု၍ မကြာခဏ ဆေးကြောပါ။

• နှာချေ၊ ချောင်းဆိုးသည့်အခါ နှာခေါင်းနှင့် ပါးစပ် လုံခြုံအောင် ဖုံးအုပ်ထားသော အဝတ် ( သို့ ) Mask အသုံးပြုပါ။ အထူးသဖြင့် ဘတ်စ်ကားစီးစဉ် အခြားသူများထံသို့ ရောဂါ မကူးစက်စေရန် သတိပြုပါ။

• နှာချေ၊ ချောင်းဆိုးသည့်အခါ တစ်ရှူးအသုံးပြုပါက အမှိုက်ပုံးထဲသို့ သေချာစွာ လွှင့်ပစ်ပါ။

• တိရစ္ဆာန်များနှင့် အကာအကွယ် မရှိဘဲ တိုက်ရိုက်ထိတွေ့ခြင်းမှ ရှောင်ကြဉ်ပါ။ 

• အသား၊ ငါးများကို သေချာစွာ ကျက်အောင် စနစ်တကျချက်ပြုတ်ပြီးမှ စားသုံးပါ။ 

• တစ်ကိုယ်ရေသန့်ရှင်းမှု ဂရုပြုဆောင်ရွက်ပါ။ 

• ကောင်းစွာ အိပ်စက်အနားယူပါ။ 

• အာဟာရပြည့်ဝသည့် အစားအစာများ စားသုံးခြင်း၊ ကိုယ်လက်လှုပ်ရှားမှု မှန်မှန်ပြုလုပ်ပါ။

လက်ရှိတွင် မြန်မာတစ်နိုင်ငံလုံး၌ ကိုရိုနာဗိုင်းရပ်စ် စောင့်ကြည့်လူနာ ( 274 ) ဦး၊ သံသယလူနာ ( 2 ) ဦးနှင့် ဓာတ်ခွဲအဖြေ စောင့်ဆိုင်းဆဲ ( 20 ) ဦး ရှိပြီး ကိုရိုနာအတည်ပြုလူနာ ( 3 ) စတင်တွေ့ရှိပြီ ဖြစ်ကြောင်း သိရသည်။

Su Mon Oo ( Mine )

Source - MOHS