မည်သည့်အကြောင်းဖြင့်ဖြစ်စေ လူ (၃၀) ထက်ပို၍ စုဝေးပါက တည်ဆဲဥပဒေများနှင့်အညီ အရေးယူမည်

Ads Ads Ads

ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသည့် အမိန့်ညွှန်ကြားချက်များကို လိုက်နာရန် ပျက်ကွက်ပါက တည်ဆဲစည်းမျဉ်း၊ စည်းကမ်း၊ ဥပဒေ၊ နည်းဥပဒေများနှင့်အညီ ထိရောက်စွာ အရေးယူ ဆောင်ရွက်သွားမည် ဖြစ်ကြောင်း ပြည်ထောင်စုအစိုးရအဖွဲ့မှ နိုဝင်ဘာ (၁၀) ရက်နေ့တွင် ထုတ်ပြန်ခဲ့သည်။

အသက်ရှူလမ်းကြောင်းဆိုင်ရာရောဂါ (COVID-19) ကြိုတင် ကာကွယ်ရေးလုပ်ငန်းများနှင့် စပ်လျဉ်း၍ ကျန်းမာရေးနှင့် အားကစားဝန်ကြီးဌာနသည် သြဂုတ်လ (၁၆) ရက်မှစ၍ လူ (၁၅) ဦးအစား လူ (၃၀) ဦး ဖြစ်စေ၊ လူ (၃ဝ) ထက်ပို၍ဖြစ်စေ စုဝေးခြင်းမပြုရန် ပြင်ဆင် ထုတ်ပြန်ခဲ့သည်။

သို့သော် ၂၀၂၀ ပြည့်နှစ် နိုဝင်ဘာလ (၈) ရက်နေ့၌ ပါတီစုံ ဒီမိုကရေစီ အထွေထွေရွေးကောက်ပွဲ ကျင်းပ ပြီးမြောက်ပြီး ဖြစ်သော်လည်း ယနေ့ထိတိုင် နေရာအနှံ့အပြား လူစုလူဝေး ပြုလုပ်၍ အောင်ပွဲခံနေခြင်းများ ရှိနေသေးသည်။

နိုဝင်ဘာလ (၉) ရက်နေ့တွင် အောင်ပွဲခံသည့် နေရာမှ ရန်ဖြစ်၍ ရန်ကုန်ဆေးရုံ အရေးပေါ်သို့ ရောက်ရှိလာသော လူနာများကို ခွဲစိတ် စစ်ဆေးရာ (၃) ဦးမှာ COVID-19 ရောဂါကူးစက်ခံနေကြောင်း ဒေါက်တာခင်ခင်ကြီး၏ အတည်ပြုချက်အရ သိရှိရသည်။

ယခုအချိန်သည် COVID-19 ရောဂါ ကူးစက်ပြန့်ပွားနိုင်သည့် အန္တရာယ်ကြီးမားနေသောကြောင့် ပြည်သူများအနေဖြင့် ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသည့် အမိန့်ညွှန်ကြားချက်များကို တိကျစွာ လိုက်နာရန် လိုအပ်ပေသည်။

ထို့ကြောင့် ပြည်ထောင်စုသမ္မတ မြန်မာနိုင်ငံတော် အစိုးရအဖွဲ့မှ ကူးစက်ရောဂါများ ကာကွယ်နှိမ်နင်းရေး ဥပဒေ ပုဒ်မ ၂၁ ပုဒ်မခွဲ (ခ) ပါ လုပ်ပိုင်ခွင့်ကို ကျင့်သုံး၍ အမိန့်အမှတ် ၁၄၇/၂၀၂၀ ဖြင့် အဆိုပါအမိန့်ကို ထုတ်ပြန်လိုက်ခြင်း ဖြစ်သည်။ 

 

COVID-19 Updated Read 880 times